Едно лице е убиено кога израелски авион нападна автомобил во Јужен Либан

БЕЈРУТ (АА) - Најмалку едно лице е убиено во израелскиот воздушен напад изведен синоќа во Јужен Либан, соопшти либанското Министерство за здравство, известува Анадолу.

Во соопштението на либанското Министерство се наведува дека цел на нападот бил автомобил во градот Деир Канун Ел Аин во областа Тир.

„Во нападот се повредени и неколку лица“, објави државната Национална новинска агенција.

Засега нема информации за идентитетот на жртвата.

Нападот следуваше откако Хезболах во понеделникот изведе напад со беспилотно летало во кој уби еден израелски војник и еден рани во Западна Галилеја во Северен Израел.

Најмалку две лица се убиени вчера наутро кога израелско беспилотно летало изврши напад врз јужниот либански град Хула.

Стравувањата од целосна војна меѓу Израел и Хезболах се зголемија за време на прекуграничните напади, особено по атентатот што Израел го изврши на 30 јули во Бејрут, убивајќи го високиот командант на Хезболах, Фуад Шукр.

Ескалацијата доаѓа во период кога Израел спроведува смртоносна офанзива врз Газа, во која од 7 октомври досега се убиени повеќе од 40.100 Палестинци.