Израелските сили убија палестински рибар

ГАЗА (АА) - Израелските сили убија еден палестински рибар кој ловел на отворено море кај Појасот Газа, подрачје кое е под израелска блокада, пренесува Anadolu Agency (AA).

Според писменото соопштение на палестинското Министерство за здравство во Газа, 20-годишниот палестински рибар Неваф Ахмед ел Атар кој ловел на северната морска граница на Газа, го загубил својот живот како резултат на истрелите упатени од страна на израелските војници.

Ова министерство не објави повеќе детали за случајот.

Од друга страна, во соопштението на палестинската Црвена полумесечина се наведува дека Атар бил ранет во стомакот од истрели што ги упатиле израелските војници од брзите воени глисери, додека тој ловел во морето.

Од 2006 година навака, Израел под блокада од копно, море и воздух го држи Појасот Газа, во којшто живеат околу 2 милиони Палестинци.