Индонезија: Еруптираше вулканот Семеру и исфрли облаци пепел

ЏАКАРТА

Еруптираше највисокиот вулкан на најгусто населениот индонезиски остров Јава, исфрлајќи пепел, што предизвика паника меѓу жителите што живеат во близина. Во моментов нема извештаи за евентуални жртви, известува Агенција Анадолија (АА).

Неочекуваната ерупција на планината Семеру во подрачјето Лумаџанг, во провинцијата Источна Јава, со пепел прекри неколку села.

„Пепелта прекри неколку села со темнина“, рече Торикул Хак, началникот на округот Лумаџанг.

Началникот Хак изјави дека неколку стотина луѓе се преместени во привремени засолништа.

Планината Семеру висока 3.676 метри за последен пат еруптираше во јануари, без да предизвика човечки жртви.

Индонезија, архипелаг со популација од над 270 милиони луѓе, се наоѓа во пацифичкиот „огнен прстен“ и е подложна на земјотреси и вулканска активност.