Melike Pala
18 Јуни 2025•Ажурирај: 19 Јуни 2025
БРИСЕЛ (АА) – Високата претставничка за надворешна политика и безбедност на Европската Унија, Каja Калас, денес ги осуди израелските воени дејства во Појасот Газа, нагласувајќи дека целта на Израел да преземе целосна контрола врз територијата и присилното раселување на цивилното население претставуваат директно прекршување на меѓународното право, јавува Анадолу.
На седницата одржана на барање на Левичарската група во Европскиот парламент, првпат во насловот на дебатата израелските дејства во Газа беа наречени „геноцид“. Обраќајќи се пред европратениците во Стразбур, Калас истакна дека иако Израел има право на самоодбрана, „она што се гледа на терен оди далеку надвор од тоа“.
Таа рече дека континуираната блокада на храна и лекови за Палестинците во Газа „не го штити Израел“, туку ги поткопува „децениските хуманитарни принципи“.
„Хуманитарната ситуација се влошува“, предупреди Калас, осврнувајќи се на неодамнешните извештаи дека повеќе од 50 Палестинци биле убиени од израелските сили додека чекале во ред за брашно.
„Пунктовите за помош се повеќе од шокантни. Секој ден што продолжува оваа војна, човештвото се оддалечува сè повеќе. Доста е.“
Таа го осуди последниот воен напад на Израел започнат пред еден месец, посочувајќи на „непропорционалната употреба на сила“, уништување на цивилната инфраструктура и „неприфатливо висок број жртви“. Според неа, 90 отсто од населението во Газа е веќе раселено, а тие што останале целосно зависат од хуманитарна помош за која не е дозволен влез.
„Наведената цел на Израел е да ја преземе контролата врз целиот Појас Газа, менувањето, намалувањето или што било друго на територијата е директно кршење на меѓународното право. Дали цело или делови од цивилното население во Газа треба трајно да бидат протерани од своите домови? И ова би било кршење на меѓународното право. Мора да го наречеме такво“, рече таа.
Осврнувајќи се на улогата на ЕУ, Калас рече дека блокот мора да го зголеми притисокот врз израелската Влада. „Притисокот мора да се зголеми врз израелската Влада. Јас ќе го направам ова од моја страна, како што постојано сум го правела тоа.“
Таа потсети дека веќе се усвоени санкции против поединци и субјекти одговорни за сериозни кршења на човековите права против Палестинците.
„Во тек се дискусии за натамошни санкции против екстремистичките доселеници и против субјектите и организациите што ги поддржуваат, како и против поддржувачите на Хамас. Но сè уште немаме единство и ова е нешто за кое сите треба да се залагаме“, додаде таа.
