Новата преодна Влада на Бугарија положи заклетва

АТИНА (АА) - Новата преодна Влада на Бугарија денес положи заклетва, објави државната новинска агенција БТА, пренесува Анадолу.

„Нашите надворешни партнери треба да видат земја со самодоверба која следи стабилен европски курс. Ќе го чуваме суверенитетот на земјата и ќе работиме за благосостојбата на бугарските граѓани“, рече премиерот на преодната Влада, Димитар Главчев, на церемонијата во Парламентот.

Главчев (60) е шеф на Националната канцеларија за ревизија.

Посакувајќи успех на преодната Влада, премиерот во заминување Николај Денков, од своја страна, рече: „Една од најтешките и најважните задачи на преодниот Кабинет е да обезбеди слободни и фер избори. Тоа е тешка задача бидејќи поткопана е довербата во некои политички процеси. Се надевам дека вашите постапки ќе помогнат да се врати оваа доверба.“

Владата на Денков беше мнозинска коалиција на власт од минатиот јуни.

Во средината на март, пропадна планираната владина ротација меѓу коалиционите партнери и потпишувањето на обновениот владин манифест за следните девет месеци.

На 26 март, конзервативната партија ГЕРБ-УДФ ја отфрли последната понуда од центристичката партија Продолжи со промените - Демократска Бугарија (ЦЦ-ДБ), поранешен партнер во власта, за формирање Влада.

Одбивањето на договорот од страна на ГЕРБ го отвори патот за предвремени национални избори, шести од април 2021 година.

Претседателот Румен Радев го одреди 9 јуни како датум за предвремени избори. Парламентарните избори се одредени да се совпаднат со изборите на бугарски претставници во Европскиот парламент.