ОН: Ситуацијата во Газа е полоша од сите досегашни процени

ЖЕНЕВА (АА) - Специјалната известувачка на Обединетите нации (ОН) за Палестина, Франческа Албанезе, изјави дека ниту еден Палестинец не е безбеден сѐ додека е под контрола на Израел, јавува Анадолу.

По посетата на Египет и Јордан, Албанезе упати соопштение за ситуацијата во Газа, која веќе седум месеци е под интензивни израелски напади.

Таа нагласи дека окупираните палестински територии се опколени со незапирлива спирала на насилство.

Албанезе рече дека изјавите на Палестинците и другите сведоци додаваат нова длабочина на злосторствата на кои светот сведочи од почетокот на израелските напади врз Газа на 7 октомври 2023 година.

Таа напомена дека брзината и интензитетот на ова насилство, кое се шири на другите окупирани територии, потврдува дека ниту еден Палестинец не е безбеден под контрола на Израел.

Таа нагласи дека Израел уште еднаш произволно го блокирал пристапот до окупираните палестински територии, додавајќи дека била принудена да напише извештај за состојбата на Палестинците од соседните земји.

Албанезе истакна дека ситуацијата во Газа е полоша од сите досегашни процени и посочи дека нападите имаат сериозни и повеќестрани последици на долг рок.

Израел започна офанзива во Појасот Газа по прекуграничниот напад на палестинската група Хамас на 7 октомври. Оттогаш во енклавата се убиени повеќе од 34.300 Палестинци.

Според податоците на Обединетите нации (ОН), израелската војна во Газа принуди 85 отсто од населението внатрешно да се раселат, предизвика акутен недостиг на храна, чиста вода и лекови, а 60 отсто од инфраструктурата на енклавата се оштетени или уништени.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните акти и да преземе мерки за гарантирање дека хуманитарната помош ќе стигне до цивилите во Газа.