Onur Usta
30 ноември 2015•Ажурирај: 30 ноември 2015
ПАРИЗ (АА) – Во Париз денес започнува Конференцијата на Обединетите нации за климатските промени (COP21). Генералниот секретар на ОН, Бан Ки-мун, и францускиот претседател, Франсоа Оланд, како домаќини на собирот, од утринава ги дочекуваат претседателите и премиерите на земјите учеснички, јавува Anadolu Agency (AA).
Конферецијата се одржува во саемскиот центар Le Bourget, а официјалното отворање на собирот ќе започне со едноминутно молчење во знак на почест на жртвите на неодамнешните терористички напади во Париз.
Во главниот град на Франција пристигнаа најголем дел од учесниците, а во текот на денот се очекува пристигнувањето и на останатите. Американскиот претседател, Барак Обама, стигна доцна синоќа и ја посети концертната сала Батлакан, која на 13-ти ноември беше место на стравотен терористички напад. Тој пред салата оддаде почест на жртвите и остави бела ружа.
Конференцијата ќе трае до 11-ти декември, а од 195 земји учество најавија над 150 лидери и скоро 10.000 функционери. На Конференцијата учествуваат и над 2.000 невладини организации, кои преку 14.000 претставници на 320 штандови ќе ги претстават своите активности и предлози за заштита на околината.
За следење на Конференцијата акредитирани се 3.000 новинари, а организаторите посебно внимание посветија на безбедносниот аспект, за што се ангажирани 11.000 полицајци. Се очекува, по повод споменатиот собир во Париз да дојдат над 40.000 луѓе, најголем дел од сообраќајниците во центарот на градот се затворени за сообраќај поради безбедносни причини.
Целта на Конференцијата е да се постигне обврзувачки договор за борба против климатските промени на глобално ниво, односно намалување на емисијата на штетни гасови кои го предизвикуваат феноменот на стаклена градина. Постоечките договори во таа област важат до 2020 година, па поради тоа се очекува лидерите на земјите да потпишат нови насоки и ветувања на кои ќе се придржуваат во следната деценија.
По дведецениски преговори, првата Конференција за климатските промени одржана е во 2009 година во Копенхаген. Најразвиените земји во светот, токму во Копенхаген, го потпишаа првиот договор кој се однесува на намалување на емисијата на штетни гасови во атмосферата.
Како основен проблем за имплементација на договорите кои се очекуваат во Париз, би можела да биде финансиската конструкција. Всушност, развиените земји би требало да им ветат значителна помош на неразвиените земји за инвестирање во нова инфраструктура која би резултирала со помало загадување на околината.
Во текот на Конференцијата во Копенхаген, развиените земји ветија дека ќе донираат 30 милијарди долари на наразвиените земји за имплементација на зелената индустрија, помал дел е реализиран, затоа се очекува лидерите на развиените земји во Париз, конкретно, да ги договорат аранжманите за таа помош до, но и по 2020 година, до датумот на важност на постоечките договори.
Конференцијата во Париз е можност и за бројни билатерални и мултилатерални разговори на лидерите на земјите учеснички на кои ќе се разговара за сите актуелни прашања, вклучувајќи ја и бегалската криза, војната во Сирија и борбата против тероризмот.
