ОН ќе објават апел за 2,8 милијарди долари за Газа и Западниот Брег

ХАМИЛТОН (АА) - Обединетите нации (ОН) вчера објавија дека ќе започнат глобален апел за донации во износ од 2,8 милијарди долари за помош на луѓето од Појасот Газа и Палестинците на окупираниот Западен Брег, јавува Анадолу.

Велејќи дека два милиони преживеани во Газа секојдневно се борат за своите животи, шефот на Канцеларијата на ОН за координација на хуманитарни прашања (OCHA) на окупираната палестинска територија, Андреа Де Доменико, рече дека и покрај напорите, „има многу малку што можеме да внесеме во Газа“.

Де Доменико рече дека глобалниот апел за помош на фондот ќе биде започнат денес.

Апелот е „да се поддржат три милиони луѓе низ Западниот Брег и Газа“, рече претставникот на ОН.

Тој истакна дека 90 отсто од помошта ќе оди во Газа и дека неговата канцеларија првично планирала да побара 4 милијарди долари, но ја намалила таа бројка поради ограничените можности за дистрибуција на помош.

„Неизвесноста е секојдневна реалност за жителите на Газа“, рече Де Доменико.

Тој изјави дека семејствата кои доаѓале во јужниот дел на Газа биле раселени седум пати, а пред два дена неговиот тим видел илјадници луѓе како тргнале на север.

„Имаше гласини дека израелските сили дозволиле или ќе дозволат луѓето да се вратат на север. Навистина, некои луѓе добија телефонски повици велејќи дека можат да се вратат. Потоа, кога се појавија илјадници луѓе, израелската Армија пукаше во областа бидејќи беа прилично изненадени од бројката“, рече тој.

Официјален претставник на OCHA го привлече вниманието на уништувањето на Хан Јунис по израелскиот напад.

„Огромното мнозинство училишта се уништени и нема универзитет во Газа. Ќе бидат потребни години за студентите да се вратат во училиштата“, рече Де Доменико.

Нагласувајќи ја важноста на образованието, Де Доменико посочи дека постојат „системски“ напади врз училиштата, особено на универзитетите.

„Образованието е основно за градење мир... образованието е надеж за иднината“, додаде тој.

Осврнувајќи се и на загрижувачките напади врз болниците, тој рече дека откако Израел извршил рација во болницата Ал Шифа, тимовите на ОН отишле таму и се соочиле со „сцена на терор“.

Напоменувајќи дека болницата е „целосно нефункционална во моментот“, Де Доменико рече дека многу тела исчезнале и луѓето не можат да ги идентификуваат роднините убиени во болницата.

Што се однесува до ситуацијата на окупираниот Западен Брег, Де Доменико рече дека таа значително се влошила од минатиот петок, кога илегалните доселеници нападнале 17 села.

Тој рече дека израелските сили ги штитат или директно ги поддржуваат нападите на илегалните доселеници и дека од 7 октомври доселениците извршиле 781 напад на Западниот Брег.