Путин: Плановите на САД во врска со Гренланд „не се екстравагантни разговори“

Рускиот претседател Владимир Путин денес изјави дека Русија сериозно ги сфаќа зборовите на американскиот претседател Доналд Трамп за можна анексија на Гренланд, јавува Анадолу.

Говорејќи на Меѓународниот арктички форум во Мурманск, Путин потсети дека слични планови се искажани и во 19 век, но дека тогаш Конгресот се спротивставил на плановите на претседателот Ендрју Џонсон.

„Ова може да изненади некого само на прв поглед. И длабока грешка е да се верува дека ова се некакви екстравагантни разговори на новата американска администрација. Ништо такво“, рече рускиот претседател.

Путин ги опиша плановите на американската страна во однос на Гренланд како „сериозни“.

„Овие планови имаат долгогодишни историски корени и очигледно е дека Соединетите Американски Држави (САД) ќе продолжат систематски да ги промовираат своите геостратешки интереси на Арктикот“, нагласи тој.