Руски официјални лица: Две лица загинаа, едно повредено на мостот Керч

ИСТАНБУЛ (АА) - Најмалку две лица загинаа, а едно е повредено рано денес поради, како што соопштија руските власти, вонредна ситуација на мостот Керч, јавува Анадолу.

Станува збор за клучен премин што ги поврзува Русија и полуостровот Крим, кој илегално го анектираше во 2014 година.

Гувернерот на Белгород, Вјачеслав Гладков, во изјавата за Телеграм рече дека едно девојче е полесно повредено, а нејзините родители загинале.

Тој додаде дека девојчето е под надзор на лекари и ќе биде транспортирано во регионот на Белгород кога тоа ќе го дозволат лекарите.

Сергеј Аксјонов, шеф на Крим назначен од Русија, на Телеграм објави дека сообраќајот на мостот Керч е запрен и дека во таа област се случила вонредна состојба.

„Со оглед на моментната ситуација, ги молам жителите и гостите на полуостровот да се воздржат од патување преку мостот на Крим и од безбедносни причини да изберат алтернативен копнен пат“, рече Аксјонов.

Шефот на прорускиот Државен совет на Крим, Владимир Константинов, изјави дека Украина го нападнала мостот Керч.

Украинските власти не одговорија на тврдењата, а независната проверка беше отежната поради војната.