Руски претставник: 76 отсто од странските компании сè уште се во Русија и покрај војната

МОСКВА (АА) - Речиси 76 отсто од странските компании продолжуваат да работат во Русија, изјави денес претседателот на Долниот законодавен дом на Русија, пренесува Агенција Анадолија (АА).

И покрај егзодусот на десетици странски компании поради војната во Украина, „75,9 отсто од странските компании останаа во Русија“, истакна спикерот на Државната дума, Вјачеслав Володин, преку Телеграм.

„Оваа одлука говори доволно - тие веруваат во добрите можности за развој на економијата на нашата земја, задоволни се од бизнис-климата. Оние што заминаа трпат милијарди долари трошоци“, рече Володин.

Тој додаде дека руските компании ги заменуваат празнините оставени од странските бизниси што заминаа откако Русија ја започна својата „специјална воена операција“ во февруари минатата година.

Володин ги повика компаниите да бидат „национално ориентирани“, така што нивните приходи да се трошат на развојот на Русија, нагласувајќи дека приоритет на Државната дума е да се обезбеди правна поддршка за тие цели.