Michael Gabriel Hernandez
07 Ноември 2024•Ажурирај: 08 Ноември 2024
ВАШИНГТОН (АА) – Потпретседателката на Соединетите Американски Држави (САД), Камала Харис, синоќа ги повика своите поддржувачи да го прифатат нејзиниот изборен пораз, ветувајќи дека ќе се реализира „мирен трансфер на власта“ откако новоизбраниот претседател Доналд Трамп обезбеди втор мандат во Белата куќа, јавува Анадолу.
Харис го призна длабокото разочарување што го чувствуваат многу нејзини поддржувачи, истакнувајќи дека резултатите „не се она што го сакавме, не се она за што се боревме, не се она за што гласавме“.
„Знам дека луѓето чувствуваат и доживуваат низа емоции во моментов. Сфаќам. Но мора да ги прифатиме резултатите од овие избори“, рече таа во обраќањето на нејзиниот матичен Универзитет Хауард во Вашингтон.
„Претходно разговарав со новоизбраниот претседател Трамп и му честитав на победата. Му кажав и дека ќе му помогнеме нему и на неговиот тим во транзицијата и дека ќе се вклучиме во мирен трансфер на власта“, додаде таа.
Харис ги повика демократите да не се откажуваат поради резултатите, туку наместо тоа да „засукаат ракави“, да се организираат и „да останат ангажирани заради слободата и правдата и за иднината што сите знаеме дека можеме да ја изградиме заедно“.
„Знам дека многу луѓе се чувствуваат како да влегуваме во мрачно време, но за доброто на сите нас, се надевам дека тоа нема да биде така. Но, Америка, ако е така, да го исполниме небото со светлина на блескави, блескави милијарда ѕвезди, светлината, светлината на оптимизмот, на верата, на вистината и службата“, рече таа.
Победата на Трамп означи историски и неверојатен кам-бек откако тој не успеа да биде реизбран за втор последователен мандат во 2020 година, кога без докази тврдеше дека изборите биле наместени и неуспешно се обиде да ги поништи резултатите.
Тој стана првиот поранешен претседател обвинет за државни или федерални кривични дела во четири одделни обвиненија и беше осуден на почетокот на оваа година во државата Њујорк по 34 точки од обвинението за фалсификување деловни досиеја за да го прикрие давањето пари за замолчување на ѕвездата во филмови за возрасни, Сторми Даниелс, која тврдеше дека имала наводна афера со Трамп.
Од годинашните избори придобивка имаше Републиканската партија како целина бидејќи ја префрли рамнотежата на моќта подалеку од демократите со преземање на контролата врз американскиот Сенат (52:43), каде што за неколку места сè уште се пребројуваат гласовите, но само 51 се потребни за преземање на мнозинството.
Контролата во Претставничкиот дом допрва треба да се утврди бидејќи резултатите од повеќе трки сѐ уште не се објавени. Досега републиканците водат над демократите со тесна разлика, 210:181, а магичната бројка за преземање контрола во Конгресот е 218.
Трамп ќе биде инаугуриран за вториот мандат во Белата куќа на 20 јануари 2025 година. Харис, како потпретседателка, треба да биде на церемонијата на полагање заклетва во Капитол.
