Ekip
09 Јуни 2023•Ажурирај: 11 Јуни 2023
АНКАРА (АА) - Завојуваните ривали на Судан денес се согласија на еднодневен прекин на огнот по интервенцијата на Ријад и Вашингтон, објавија државните медиуми на Саудиска Арабија, пренесува Анадолу.
Според саудиската новинска агенција (SPA), двете земји објавија дека претставниците на Суданските вооружени сили (САФ) и Силите за брза поддршка (РСФ) се согласиле на 24-часовен прекин на огнот низ целата земја, почнувајќи од сабота, 6 часот наутро по локално време.
„Завојуваните сили се согласија да ги прекинат сите видови непријателства, борби и зајакнување на позициите“, се додава.
Примирјето вклучува и дозволување непречено движење и испорака на хуманитарна помош низ целата земја.
Многу рунди мировни преговори меѓу двете страни се одржаа во Џеда од почетокот на борбите во средината на април, што резултираше со неколку несигурни и привремени договори за прекин на борбите.
Несогласувањето што започна околу интеграцијата на паравоената група во Вооружените сили, клучен услов за транзицискиот договор на Судан со политичките групи, прерасна во целосен конфликт на 15 април, кога избија борби во главниот град Картум.
Судан е без функционална влада од октомври 2021 година, кога војската ја разреши преодната влада на премиерот Абдала Хамдок и прогласи вонредна состојба во потег што политичките сили го оквалификуваа како „државен удар“.
Преодниот период, што започна во август 2019 година по соборувањето на претседателот Омар ал-Башир, требаше да заврши со избори на почетокот на 2024 година.
Милиони луѓе сега се соочуваат со хуманитарна катастрофа и им е потребна помош.
