Турција ги осуди терористичките напади во Техеран

АНКАРА (АА) - Република Турција најостро ги осуди терористичките напади коишто утринава се случија во центарот на Техеран, еден пред турбето на поранешниот верски водач, ајатолахот Хомеини, а другиот во зградата на иранскиот Парламент, јавува Anadolu Agency (AA).

Министерството за надворешни работи на Турција упати порака на сочувство до владата и народот на пријателскиот Иран и нападите ги оцени како варварски чин.

Иранските државни медиуми објавија дека четворица напаѓачи утринава влегле во зградата на парламентот и извршиле оружен напад, и дека иранските безбедносни сили спроведуваат акција на неутрализирање на напаѓачите.

Паралелно со тоа, вториот напад се случи пред турбето на поранешниот ирански верски лидер, ајатолахот Хомеини, а иранските државни медиуми јавуваат дека станува збор за самоубиствен бомбашки напад.

Досега е потврдено дека најмалку седум лица се убиени во нападот во зградата на парламентот, а пак во нападот кај турбето на Хомеини се повредени повеќе лица.

Одговорноста за нападот ја презеде терористичката организација ДЕАШ.