Украина формира воена администрација во руската област Курск

МОСКВА (АА) - Киев формира воена администрација на територијата на руската област Курск, изјави денес украинскиот командант Олександр Сирски, јавува Анадолу.

Преку видеоконференција, Сирски го информираше претседателот на Украина, Владимир Зеленски, дека генерал-мајор Едуард Москалев е назначен за шеф на воената канцеларија, се вели во соопштението на украинскиот Генералштаб.

„Нашите трупи во јуришната група постигнаа напредок од еден до 3 километри на различни места во правец на непријателската страна. Борбите продолжуваат по целата линија на фронтот. Генерално, ситуацијата е под контрола“, рече Сирски.

Според воениот началник, борбите во моментов се водат во близина на селото Малаја Локња во подрачјето на Суџа во регионот на Курск.

„Се надевам дека голем број затвореници ќе бидат однесени таму. Продолжуваме да го надополнуваме нашиот фонд за размена на затвореници“, рече тој.

Упадот на Киев во руската област Курск започна ноќта меѓу 5 и 6 август кога украинските сили влегоа во близина на Суџа. На 12 август, украинскиот претседател Владимир Зеленски ја потврди операцијата, но не даде информации за нејзините цели.

Руското Министерство за вонредни состојби објави дека околу 9.500 луѓе се евакуирани од борбената зона.

Рускиот претседател Владимир Путин го осуди упадот како „терористички напад“.

Независната проверка на тврдењата на двете страни останува тешка поради тековниот конфликт.