Уште двајца новинари загинаа во Газа: Бројот на загинати новинари од 7 октомври досега порасна на 109

Уште двајца палестински новинари беа убиени во израелските напади во Појасот Газа во неделата, со што бројот на убиени новинари од 7 октомври се искачи на 109, соопшти владината канцеларија за медиуми, пренесува Анадолу.

Во соопштението, канцеларијата ги идентификува двете жртви како Хамза Ваел Ал-Дахдух, син на шефот на бирото на Ал Џезира во Газа, Ваел Ал-Дахдух и Мустафа Тураја, кои ги загубија животите во израелски бомбашки напад врз нивниот автомобил во градот Хан Јунис во јужниот дел на Појасот Газа.

Канцеларијата за медиуми најостро го осуди ова грозоморно злосторство извршено од „израелската окупаторска армија против новинарите“.

„Израел има за цел да ги заплаши новинарите во неуспешниот обид да ја прикрие вистината и да спречи медиумско покривање“, додаде канцеларијата.

Канцеларијата за медиуми ги повика „сите синдикати на печатот, тела за човекови права и правни тела да го осудат ова злосторство и да го осудат неговото повторено извршување од страна на окупацијата“.

Исто така, повика на притисок „окупацијата да ја запре геноцидната војна против нашиот беспомошен народ во Појасот Газа“.

Израел започна немилосрдни воздушни и копнени напади врз Појасот Газа по прекуграничниот напад на палестинската група на отпор, Хамас, на 7 октомври.

Оттогаш се убиени најмалку 22.722 Палестинци, а 58.166 повредени, според здравствените власти на Газа. Според официјалните бројки, речиси 1.200 лица загинаа во Израел.

Нападот ја остави Газа во урнатини, при што 60 отсто од инфраструктурата на енклавата е оштетена или уништена, а речиси 2 милиони жители се раселени поради сериозен недостиг на храна, чиста вода и лекови.