Франција дозволи израелски компании да учествуваат на големиот меѓународен саем за безбедност

ИСТАНБУЛ (AA) – Франција им дозволи на израелските компании да учествуваат на големиот Меѓународен саем за безбедност „Милипол Париз“, пренесе денес француската телевизија БФМТВ, пренесува Анадолу.

Францускиот претседател Емануел Макрон одобрил „сите израелски компании што сакаат“ да изложуваат на саемот кој се отвора утре, наведува телевизијата, повикувајќи се на Елисејската палата.

Одлуката, според извештајот, следува по стапувањето во сила на прекинот на огнот меѓу Израел и Хамас на 10 октомври.

Ова е 24. издание на водечкиот биенален настан, кој се одржува под покровителство на француското Министерство за внатрешни работи и годинава се очекува да собере околу 1.200 изложувачи, меѓу кои и 39 израелски фирми.

На Парискиот авиосаем во јуни, пристапот до израелските штандови беше блокиран со ѕидови и црни церади по владините наредби со кои се забранува прикажување на офанзивна опрема

Израелските компании исто така беа спречени да учествуваат и на саемот за копнена одбрана Еуросатори во пролетта 2024 година, а само по судска одлука во последен момент им беше дозволено да изложуваат на саемот Еуронавал есента истата година.

Прекинот на огнот во Газа стапи во сила на 10 октомври под египетско-катарско-американско-турско посредништво, но Израел продолжи со прекршувања и го блокира напредокот кон втората фаза од договорот, која се однесува на безбедносни и административни аранжмани во Појасот и израелските повлекувања.