Чавушоглу во Белград: „Балканот треба да ја преземе контролата над својата судбина“

БЕЛГРАД (АА) - Турскиот министер за надворешни работи, Мевлут Чавушоглу, на денешниот Самит на иницијативата „Отворен Балкан“ во Белград изјави дека е време Балканот да ја преземе судбината во свои раце, јавува Агенција Анадолија (АА).

Потсетувајќи дека Балканот низ својата историја бил отворен за различни влијанија поради неговата географска локација, Чавушоглу укажа на важноста на регионалната балканска политика.

„Отсекогаш ја споменувавме важноста на политиката на Балканот. Навистина, време е да ја земеме својата судбина во свои раце“, рече Чавушоглу и нагласи дека особено ветувачка цел на иницијативата „Отворен Балкан“ е да обезбеди слободен пристап до пазарот на трудот.

Размената на ученици и студенти, заедничките истражувачки проекти и признавањето на професионални сертификати, исто така, ќе ги задржат квалификуваните млади од Балканот во регионот.

„Се надеваме дека сево ова ќе го реши проблемот со одливот на мозоци со кој се соочува Балканот“, рече турскиот министер и додаде дека доаѓајќи од Туркије, земја која е еден од најголемите инвеститори во регионот, верува дека тоа ќе ги поттикне и директните странски инвестиции.

Истакна дека војната меѓу Русија и Украина е повик за будење.

„Војната во Европа е повик за будење. Гледаме колку сме ранливи на разни шокови. Доаѓа зима. Енергетиката и обезбеденоста со храна станаа заеднички предизвици. Нема друг рецепт освен солидарноста“, рече Чавушоглу.

Тој посочи дека како Туркије продолжуваат да даваат сѐ од себе за непречено спроведување на Договорот за извоз на украинско жито, што беше постигнат во Истанбул со посредство на Туркије.

„Ние даваме сѐ од себе за да им помогнеме на нашите балкански соседи да ги обезбедат своите потреби за гас за зимата“, рече Чавушоглу, додавајќи дека „војната ја потврди важноста на заедничките инвестиции во обновливите извори на енергија и интеграцијата на пазарите на електрична енергија и гас“.

„Иницијативата „Отворен Балкан“ ја гледаме како мост меѓу Балканот и Европската Унија. Во минатото, проширувањето беше меѓу најуспешните политики на ЕУ. Но, ЕУ стана внатрешно насочена и тесно политичките интереси ја киднапираа агендата за проширување. Никој не може да понуди добро објаснување зошто Северна Македонија и Албанија чекаа толку долго. И на двете им честитаме за почетокот на пристапните преговори“, рече Чавушоглу.

Шефот на турската дипломатија рече дека војната во Европа ги потсети сите на важноста на проширувањето на Европската Унија.

Тој изрази надеж дека искуството на Северна Македонија и Албанија во однос на пристапните преговори ќе се разликува од искуството на Туркије.

„Не сакам ни да зборувам за тоа како членството на Туркије е политизирано од тесни интереси. Се надеваме дека иницијативата ќе ја забрза европската интеграција на регионот и дека уште повеќе земји ќе се приклучат на „Отворен Балкан“. Сетете се дека седиме заедно на иста маса во рамките на Процесот за соработка во Југоисточна Европа (ПСЈЕ) и повеќе од 25 години. Иако преку оваа иницијатива во сопственост на Балканот има многу да се постигне, остануваат два предизвици. Прво, политичката криза во Босна и Херцеговина. Претседателот Реџеп Таип Ердоган следната недела ќе ги посети Босна и Херцеговина, Србија и Хрватска. Актуелната ситуација во Босна и Херцеговина ќе биде на врвот на нашата агенда“, нагласи Чавушоглу, и додаде:

„Не можеме да дозволиме нов конфликт во срцето на Балканот.“

Зборувајќи за вториот предизвик, Чавушоглу го спомена процесот на дијалог меѓу Белград и Приштина.

„Договорот за лични карти ја покажува заслугата да се фокусираме на нашите заеднички интереси наместо на разликите. Туркије има отворена комуникација со двете страни. Ќе продолжиме да го поттикнуваме дијалогот за да се постигне договор за табличките на возилата и другите преостанати прашања. Некои можеби мислат дека Туркије е аутсајдер или ривал. Ова е сосема погрешно, бидејќи ние сме Балканци и се гордееме со тоа“, рече Чавушоглу.

Турскиот министер ги отфрли вештачките поделби на Балканот.

„Ги отфрламе вештачките поделби. Поделбата на Балканот на запад или исток нема да ги реши нашите проблеми и нема да му служи на никого. Балканот треба да ја преземе контролата врз сопствената судбина. Треба да ги отстраниме пречките за раст. Треба да напредуваме заедно. Како и секогаш, ќе продолжиме да го поддржуваме секој напор за доброто на нашиот регион“, заклучи Чавушоглу.

Во Белград денеска се одржува Самитот на лидерите на „Отворен Балкан“, на кој, покрај членовите на иницијативата, Србија, Северна Македонија и Албанија, присуствуваат и претставници на Туркије, Босна и Херцеговина, Црна Гора и Унгарија.