Косово може да ги користи дроновите Бајрактар ТБ-2 само со одобрување од командантот на КФОР

ПРИШТИНА (АА) - Од мировната мисија на НАТО во Косово (КФОР) информираа дека Косовските безбедносни сили можат да ги користат дроновите Бајрактар ТБ-2 само со одобрување од командантот на КФОР, пренесува Анадолу.

КФОР соопшти дека „што се однесува до употребата на сите категории дронови и поврзани ограничувања, вклучително и Бајрактар ТБ-2, според Резолуцијата 1244 на Советот за безбедност на Обединетите нации (СБОН) од 1999 година, командантот на КФОР има примарна надлежност за воздушниот простор над Косово“.

„Горниот воздушен простор на Косово може да се користи само за прелет на Косово од една земја во друга за комерцијални летови, а долниот воздушен простор може да се користи за посебни потреби, од случај до случај и со претходно одобрување од командантот на КФОР. Очекуваме институциите на Косово да обезбедат координација и да се придржуваат кон постојните процедури“, наведуваат од КФОР.

КФОР продолжува да го поддржува развојот на Косовските безбедносни сили во рамките на нивниот првичен мандат, вклучително операции за цивилна заштита, како што се гаснење пожари, отстранување експлозивни убиствени средства, потрага и спасување и одговор на излевање на опасен материјал.

КФОР останува целосно фокусиран на обезбедувањето сигурно и безбедно опкружување и слобода на движење за сите заедници на Косово, во согласност со својот споменат мандат на ОН.

Премиерот на Косово, Албин Курти, во неделата објави дека Владата на Косово купила турско беспилотно летало Бајрактар ТБ-2 за потребите на Косовските безбедносни сили. Курти на Фејсбук, заедно со објавената фотографија на дронот, напиша дека офицери на Косовските безбедносни сили ја завршиле обуката за употреба на дронот Бајрактар ТБ-2.