ПРИШТИНА (АА)
Косовската полиција, која по назначувањето на новите градоначалници Албанци работи за непречено одвивање на безбедноста во општините населени со мнозинско српско население на северот на Косово, се соочи со локалните Срби, пренесува Анадолу.
Полицијата претходно соопшти дека „им помага на градоначалниците на северните општини Звечан, Лепосавиќ и Зубин Поток да го остварат своето право на работа, во службените објекти на овие општини“.
Медиумите објавија дека некои локални Срби се собрале пред зградата на Општина Звечан, каде што косовската полиција потоа употребила солзавец, а се дознава дека се слушнале и истрели.
Се најавува и дека претходно во северните општини се слушнале сирени, а запалени се и полициски автомобили.
На вонредните локални избори на 23 април беа избрани градоначалниците на општините Северна Митровица, Звечан, Лепосавиќ и Зубин Поток, како и советниците на општинското Собрание на Звечан и Лепосавиќ, кои положија заклетва оваа недела.
Најголемата српска партија Српска листа, која ги бојкотираше изборите, се спротивстави на изборот на нови градоначалници во овие општини.
Поради бојкотот на Српската листа, учеството во гласањето беше ниско, односно 3,47 отсто, за што премиерот на Косово, Албин Курти, рече дека „директниот притисок од официјален Белград директно влијаел на слабиот одѕив на граѓаните Срби на изборите“.
На 19 мај, Српската листа одржа и вонредна прес-конференција во Северна Митровица, на која потпретседателот на партијата, Игор Симиќ, рече дека српските граѓани се посветени на мирот, но дека на 1 јуни „одговор ќе следува по решителната акција на српското население доколку не се запре негирањето на нивните основни права“.
Изборите во четирите северни општини со српско мнозинство беа одржани откако претходните градоначалници од Српската листа поднесоа оставки во ноември минатата година како одговор на одлуката на косовската Влада да ги легализира автомобилите со регистарски таблички издадени од Србија.
Српскиот претседател Александар Вучиќ издаде наредба за подигање на борбената готовност на Војската на Србија на највисоко ниво, пренесува Анадолу.
Припадниците на косовската полиција денеска влегоа во зградата на Општина Звечан, и употребија солзавец и шок-бомби за да ги разбркаат насобраните граѓани.
Според извештаите на РТС, претседателот и врховен командант на Војската на Србија, Александар Вучиќ, потпишал наредба за подигање на борбената готовност на единиците на Војската на Србија на највисоко ниво и им наредил веднаш да тргнат кон границата со Косово.
Полицијата на Косово преку писмено соопштение информира дека денеска по службена должност им помага на новите градоначалници на општините Звечан, Лепосавиќ и Зубин Поток, на северот на Косово, да го остварат своето право на работа во службените објекти на соодветните општини.
Во меѓувреме, косовските медиуми јавуваат дека косовската полиција се судрила со српски државјани, кои се собрале пред зградата на Општина Звечан. На снимките што граѓаните ги пренесоа во живо се гледа дека е фрлен солзавец и дека се слушаат истрели.
Насобраните српски граѓани се обиделе да ѝ дадат отпор на полицијата, која одговорила со солзавец и шок-бомби. Истовремено во близина се слушнале и истрели.
Претходно во Северна Митровица, Зубин Поток и Лепосавиќ напладне се огласиле сирени.
Тоа доведе до собир на граѓани пред општинските згради во Зубин Поток, Звечан и Лепосавиќ.
Новите градоначалници на Звечан, Зубин Поток и Лепосавиќ вчера положија заклетва во јавните објекти во албанските села од тие општини, додека градоначалникот на Северна Митровица минатиот петок положи заклетва.
