Европа возвраќа на царините на Трамп

ИСТАНБУЛ (АА) - Европската комисија денес објави дека започнала серија контрамерки против дополнителните царини за увозот на челик и алуминиум од ЕУ, јавува Анадолу.

Комисијата потсети на суспендираните „мерки за ребалансирање“ против царинските мерки на американскиот претседател Доналд Трамп од 2018 година за време на неговиот прв мандат, истакнувајќи дека ќе ги врати овие суспендирани мерки од 2018 и 2020 година.

Дополнително, ќе подготви нов пакет на дополнителни мерки против САД, кои ќе опфатат повеќе производи, „од чамци до бурбон, до мотори“.

„Бидејќи новите американски царини се значително поголеми во обем и влијаат на значително поголема вредност на европската трговија, Комисијата на 12 март започна процес за воведување дополнителни контрамерки против САД“, се вели во соопштението.

„Овие мерки ќе погодат вредност на стоки од приближно 18 милијарди евра (околу 19,6 милијарди долари), кои потоа ќе се применуваат заедно со повторно воведените мерки од 2018 година. Целта е да се осигури дека вкупната вредност на мерките на ЕУ ќе одговара на зголемената вредност на трговијата погодена од новите американски царини.“

Во 2018 година, Трамп воведе царини за извозот на европски челик и алуминиум, познати како дел 232, кои опфатија вредност на стоки од 6,4 милијарди од ЕУ, а во јануари 2020 година стапија на сила дополнителни царини за одредени производи од челик и алуминиум.

Оваа година, Вашингтон одлучи да ги врати санкциите од 2018 година, да ги зголеми царините од 10 отсто на 25 отсто и да ги прошири на други производи што содржат челик и алуминиум.

Комисијата соопшти дека новите царини ќе погодат вкупно 26 милијарди евра од извозот на Блокот, што претставува околу 5 отсто од вкупниот извоз на ЕУ во САД, а тоа ќе резултира со зголемени давачки за увозниците во САД до 6 милијарди евра.

Се додава дека засегнатите страни ќе дебатираат за новите контрамерки до 26 март, по што Комисијата ќе го финализира процесот на нивно усвојување, а тие ќе стапат на сила од средината на април.