Иран во финансиските трансакции со Русија почна да користи рубли и риали

АНКАРА (АА) - Иран во финансиските трансакции со Русија почна да користи руски рубли и ирански риали за да го намали ефектот на доларот, пренесува Агенција Анадолија (АА).

Како што пренесува официјална новинска агенција ИРНА, Али Салихабади, шефот на Централната банка на Иран, по состанокот на Министерскиот совет одржан во главниот град Техеран, во изјавата за медиумите истакна дека трговијата со рубли и риали е започната од вчера.

Салихабади, исто така, истакна дека започнувањето трговија со домашни валути на девизниот пазар дополнително ќе ги зајакне економските односи со Русија и може да ја намали улогата на другите странски валути како што се доларот и еврото на иранскиот пазар.

„Вчера беше направен добар чекор со трансакцијата од 2 милиони рубли. Се надевам дека ќе продолжи. Според преземените мерки, обемот на овие трансакции ќе се зголеми и пазарот ќе се продлабочи“, нагласи Салихабади.

„Се надеваме дека ќе имаме разновидно портфолио на валути што ќе го намалат обемот и влијанието на валутите како што се доларот и еврото“, додаде тој.

Врховниот верски лидер на Иран, ајатолахот Али Хамнеи, за време на вчерашната средба со рускиот претседател Владимир Путин во Техеран, истакна дека доларот постепено треба да се тргне од глобалната трговија.

Од друга страна, Путин, истакнувајќи дека САД се обидуваат да го користат доларот како алатка за притисок, рече дека Иран и Русија дизајнираат начини да ги користат националните валути во своите трговски трансакции.