Адвокат донесе магариња пред косовското Собрание во знак на протест поради застојот во работата

ПРИШТИНА (АА) – Во знак на протест поради повеќемесечниот политички застој во работата на косовското Собрание, поради неговото неконституирање по изборите на 9 февруари годинава, адвокатот Арианит Кочи денес донесе четири магариња пред Собранието, јавува Анадолу.

Полицијата го спречи Кочи да влезе во просториите на Собранието со стереотипно тврдоглавите животни, со кои сакаше да ја покаже „тврдоглавоста“ на политичарите кои, по 41-ви пат не успеваат да го формираат законодавниот дом на земјата, со тоа што не прават политички компромис.

Во разговор со новинарите, Кочи рече дека неговиот гест има за цел да промовира единство, а не поделба, додавајќи дека најмногу го обвинува лидерот на Движењето „Самоопределување“, вршителот на должноста премиер Албин Курти, за неуспехот за формирање влада.

Тој, исто така, ги критикуваше и останатите партии, истакнувајќи: „Можеби оваа ситуација им одговара“.

Собранието на Косово денес не успеа да се конституира дури ни по 41-от обид.