Faruk Zorlu
17 Јули 2024•Ажурирај: 18 Јули 2024
АНКАРА (АА) – Одделот за домашна безбедност (DHS) и Федералното биро за истраги (FBI) објавија билтен со предупредување до агенциите за спроведување на законот низ државата за можни „последователни или одмазднички“ напади поради обидот за атентат на поранешниот американски претседател Доналд Трамп, пренесува Анадолу.
Според „Еј-би-си њуз“, во заеднички билтен објавен во понеделникот вечерта од страна на ДХС и ФБИ се бара внимателност на претстојните настани поврзани со изборите, наведувајќи ја загриженоста од „последователни или одмазднички“ напади.
Предупредувањето, издадено кога започнува Националната републиканска конвенција во Милвоки, ги повика луѓето да бидат внимателни и да го пријават секое сомнително однесување.
Билтенот изразува загриженост за потенцијално насилство на претстојните настани поврзани со претседателските избори 2024, наведувајќи ги заканите од членови на онлајн заедниците.
„ФБИ и ДХС и понатаму се загрижени... особено имајќи предвид дека поединци во некои онлајн заедници се закануваат, поттикнуваат или повикуваат на акти на насилство како одговор на обидот за атентат“, се наведува во билтенот.
Предупредувањето дојде по неколку дена откако Трамп, кој бара реизбор, за влакно избегна атентат на митинг во Пенсилванија во саботата. Тој присуствуваше на конвенцијата на републиканците во понеделникот со повредено десно уво.
Вооружениот напаѓач Томас Метју Крукс (20) беше застрелан и убиен од Тајната служба на местото на настанот. Трамп замина од настанот со крваво уво, но го преживеа нападот.
Федералните власти сè уште ги истражуваат мотивите на напаѓачот, истакнувајќи дека „темите кои предизвикуваат поделба во јавното мнение“ може да придонесат за загрозувачка средина.
Билтенот предупреди дека поединци или мали групи би можеле да продолжат да целат политички собири и настани од кампањата.
Билтенот ја призна тешкотијата во откривањето на таквите закани, со оглед на „многу личната природа на радикализацијата и мобилизацијата за насилство“.
Пред овој инцидент, федералните власти веќе забележаа политички мотивирани напади и заговори насочени кон владини претставници и кандидати.
Во текот на изминатата година, пликови со безопасен бел прав беа испратени до републиканските пратеници во Канзас, Тенеси и Монтана. Овие инциденти ги истакнаа постојаните закани со кои се соочуваат изборните службеници и работниците на избирачките места, при што лажните тврдења за изборите во 2020 година сè уште ги подгреваат тензиите.
Обидот за атентат „ја зајакнува нашата проценка дека цели поврзани со изборите се под зголемена закана од напад или други видови инциденти“, се додава во билтенот.
