Во израелските воздушни напади во Газа убиени се 2.704 деца

ГАЗА (АА) - Бројот на загинати Палестинци во израелските воздушни напади врз Појасот Газа се искачи на 6.546, соопшти денес палестинското Министерство за здравство, јавува Анадолу.

„Меѓу убиените има 2.704 деца, 1.584 жени и 364 постари лица“, рече портпаролот на Министерството, Ашраф ал-Кудра на прес-конференцијата во Газа.

Тој истакна дека во нападите се ранети 17.439 луѓе, а околу 1.600 се заробени под урнатините, меѓу кои 900 деца.

Тој додаде дека во израелските напади загинале 73 медицински работници, а биле уништени 25 амбулантни возила.

„Здравствениот систем во Газа е во колапс“, рече Ал-Кудра, како резултат на бруталните израелски напади и недостигот на неопходни ресурси.

Израел ја бомбардира Газа по ненадејниот напад на Хамас на 7 октомври, ставајќи ја целата енклава под блокада, поради што 2,3 милиони жители имаат малку вода, гориво и медицински материјали.

Израелската војска продолжи со своите интензивни воздушни напади врз Газа, во кои уништи цели квартови.