Ayhan Şimşek
18 Февруари 2022•Ажурирај: 18 Февруари 2022
БЕРЛИН
Германските власти ја повикаа Русија да преземе сериозни чекори кон деескалација, да ја повлече Армијата од украинската граница и да се вклучи во дипломатијата за мирно да се реши кризата во регионот, јавува Aгенција Анадолија (АА).
„Декларираната подготвеност на Русија да се приклучи на преговорите мора да биде поткрепена со реални понуди за дијалог, декларираното повлекување на војниците мора да биде поткрепено со проверливо повлекување на војниците“, изјави германската министерка за надворешни работи, Аналена Баербок.
Таа тоа го изјави во Берлин пред патувањето на тридневната Минхенска безбедносна конференција, на која учествуваат повеќе од 35 шефови на влади и околу 100 министри за надворешни работи и за одбрана од 18 до 20 февруари.
Баербок рече дека масовното воено зајакнување на Русија околу Украина создаде исклучително опасна ситуација и го зголеми ризикот од избувнување воен конфликт.
„Со невиденото натрупување на војници долж украинската граница и поставување барања од времето на Студената војна, Русија ги доведува во прашање основните принципи на европскиот мировен поредок“, рече шефицата на германската дипломатија.
Изразувајќи жалење за одлуката на Москва да не испрати свој претставник на Минхенската безбедносна конференција оваа година, Баербок рече дека Русија навистина пропушта важна можност за дијалог.
Баербок рече дека ќе одржи различни состаноци со нејзините колеги на маргините на Минхенската безбедносна конференција за да се разговара за најновите случувања во регионот.
„Ќе го искористиме состанокот на министрите за надворешни работи на Г7 што го свикав, како и разговорите и дискусиите меѓу земјите присутни во Нормандиски формат за да испратиме сигнал за единство, односно подготвени сме да се вклучиме во сериозен дијалог за безбедност на сите“, рече Баербок.
Американскиот државен секретар Ентони Блинкен, британската министерка за надворешни работи, Лиз Трас и францускиот министер за надворешни работи, Жан-Ив ле Дријан ќе бидат во Минхен на годишниот собир од висок профил.
Блинкен вчера пред Советот за безбедност на ОН изјави дека Кремљ собрал повеќе од 150.000 војници околу границите на Украина, во Русија, Белорусија и окупираниот Крим.
„Русија вели дека ги повлекува тие сили. Ние не гледаме дека тоа се случува на терен“, рече Блинкен, додавајќи дека САД имаат информации кои укажуваат дека Русија се подготвува да ја нападне Украина.
Русија постојано негира каков било план за напад на Украина и ги обвини западните земји дека ја поткопуваат безбедноста на Русија со проширување на НАТО кон нејзините граници.
