Данска ќе ја предводи истрагата за руските злосторства во Украина

АНКАРА (АА) - Формирана е платформа за „давање отчет“ за кршењето на човековите права извршено од страна на Русија во војната против Украина, што ќе ја предводи Данска, известува Агенција Анадолија (АА).

Во соопштението на данското Министерство за надворешни работи се наведува дека министерот за надворешни работи, Јепе Кофод, започнал активности со министрите за надворешни работи на Албанија, Колумбија, Маршалските Острови, Холандија и Украина за да ја повикаат на одговорност Русија за воените злосторства извршени во Украина од избувнувањето на војната во февруари.

Во изјавата на оваа тема, Кофод рече дека од „витално“ значење за идните гонења е да се обезбеди одговорност за секое сторено кривично дело извршено во Украина.

Споменатите земји предводени од Данска формираа „платформа за одговорност“ наречена „Група на пријатели“ во рамките на Меѓународниот кривичен суд (МКС), чија цел е да обезбеди координација помеѓу иницијативите што работат на документирање и гонење на прекршувањата на законите од страна на Русија и зголемување на меѓународната поддршка во тој поглед.

Од друга страна, се информира дека данската Влада обезбедила 100.000 долари за новиот фонд формиран од МКС за истрага на злосторствата.