За прв пат по две децении, Израел распоредува тенкови на окупираниот Западен Брег

АНКАРА (АА) - За прв пат во повеќе од две децении, денес израелската војска распореди тенкови на окупираниот Западен Брег поради, како што вели, воената ескалација на окупираната територија, пренесува Анадолу.

Во соопштението на армијата се вели дека трупите на пешадиската бригада Нахал и единицата командоси Дувдеван започнале операции во неколку села во близина на Џенин во северниот дел на Западниот Брег.

Израелскиот јавен сервис КАН соопшти дека распоредувањето тенкови е дел од „пошироките подготовки за проширување на воените операции во северниот дел на Западниот Брег“.

Тоа е прв пат од 2002 година израелската армија да распореди тенкови како дел од операцијата „Одбранбен штит“ на Западниот Брег.

Израелската војска од минатиот месец спроведува воени операции во северниот дел на Западниот Брег, во кои се убиени најмалку 60 Палестинци, а илјадници се раселени.

Во рациите кои ги спроведува израелската војска на Западниот Брег од 7 октомври 2023 година, кога започна израелската офанзива врз Појасот Газа, убиени се најмалку 923 Палестинци, а речиси 7.000 се повредени во нападите на израелските сили и илегалните еврејски доселеници, според палестинското Министерство за здравство.

Меѓународниот суд на правдата во јули објави дека долгогодишната окупација на палестинските територии од страна на Израел е нелегална, и побара евакуација на сите еврејски населби на Западниот Брег и Источен Кудс (Источен Ерусалим).