Лавров: „НАТО и ЕУ ја собираат коалицијата за војна со Русија“

БАКУ (АА) - Европската Унија (ЕУ) и НАТО ја собираат коалицијата за војна со Москва, изјави денеска рускиот министер за надворешни работи, Сергеј Лавров, коментирајќи го доделувањето кандидатски статус за ЕУ на Украина и Молдавија, јавува Агенција Анадолија (АА).

Говорејќи на прес-конференција во Баку по средбата со неговиот азербејџански колега Џејхун Бајрамов, Лавров рече дека ситуацијата потсетува на состојбата пред Втората светска војна кога Хитлер ги обедини повеќето европски земји за војна против Советскиот Сојуз.

„Кога требаше да започне Втората светска војна, Хитлер ги собра повеќето европски земји под неговите знамиња. Сега ЕУ и НАТО исто така ја собираат истата модерна коалиција за борба, и генерално, за војна со Руската Федерација. Ќе го разгледаме сево ова многу внимателно“, рече тој.

Лавров потоа ја најави втората билатерална средба за демаркација на границата меѓу Ерменија и Азербејџан, која ќе се одржи во Москва.

„Двете страни ја потврдија својата подготвеност да работат на ова прашање, сметајќи дека е многу значајно за сегашната фаза на решението“, истакна тој.

„Овој состанок беше договорен [да се одржи] во Москва и во моментов избираме датуми што би биле погодни за двете страни“, рече Лавров.

Лавров, исто така, ја потврди подготвеноста на Русија да придонесе за потпишување мировен договор меѓу Баку и Ереван и ја поддржа идејата за соработка во формат 3+3 во Јужен Кавказ, составен од Ерменија, Азербејџан и Грузија и нивните три соседи - Русија, Турција и Иран.

Запрашан за доделувањето кандидатски статус на Украина и Молдавија за влез во ЕУ, Лавров рече дека, за разлика од НАТО, ЕУ не е воена организација и затоа членството во оваа структура не претставува закана за Русија.

Но, рускиот министер истакна дека Москва ги следи чекорите на ЕУ и се сомнева дека „русофобната политика“ на Блокот ќе исчезне во скоро време.

Од своја страна, Бајрамов рече дека приоритет на Баку е нормализација и долгорочен мир во регионот и дека овој процес не може да биде „заложник“ на групата Минск за Карабах на Организацијата за безбедност и соработка во Европа (ОБСЕ).

„Групата Минск, тело под ОБСЕ, пред околу три децении беше задолжено да го реши спорот со Карабах, но не постигна никакви резултати за речиси три децении“, нагласи тој.

Групата Минск на ОБСЕ, со која копретседава Франција, Русија и САД, беше формирана на 24 март 1992 година за да се најде мирно решение за конфликтот, но безуспешно. Копретседавачите на групата Минск, кои периодично ги посетуваа двете земји и се среќаваа со властите, не направија ништо повеќе од предупредување до страните секојпат да се придржуваат до прекинот на огнот.