Медведев предлага снабдување на Северна Кореја со оружје

ИСТАНБУЛ (АА) - Заменик-шеф на рускиот Совет за безбедност, Дмитриј Медведев, денес сугерираше дека Москва би можела да ѝ доставува оружје на Северна Кореја против сличен чекор на Јужна Кореја кон Украина, јавува Анадолу.

„Се прашувам што ќе кажат жителите на оваа земја (Јужна Кореја) кога ќе ги видат најновите дизајни. Руско оружје од нивните најблиски соседи - нашите партнери од ДНРК (Северна Кореја)? Тоа се нарекува 'кви про кво'“, изјави Медведев.

Тој ги даде своите коментари преку Телеграм откако јужнокорејскиот претседател Јун Сук Јеол, според наводите, рече дека Сеул може да обезбеди помош покрај хуманитарната или финансиската поддршка, доколку Украина се соочи со напад од големи размери врз цивилите во војната против Русија.

Сеул не му испорачуваше оружје на Киев од почетокот на руско-украинската војна минатата година, но, прати хуманитарна помош до нацијата погодена од војна.

„Доколку постои ситуација што меѓународната заедница не може да ја оправда, како што се напади од големи размери врз цивили, масакри или сериозно кршење на законите на војната, може да ни биде тешко да инсистираме само на хуманитарна или финансиска поддршка“, рече Јун.

„Верувам дека нема да има ограничувања во обемот на поддршката за одбрана и обновување на земјата што незаконски е нападната и според меѓународното и домашното право“, додаде тој.

Сепак, Сеул ги отфрли сите шпекулации за неговиот став во врска со руско-украинската војна.

„Ставот на Владата (за Украина) не е променет“, изјави претседателски службеник на Јужна Кореја за новинската агенција „Јонхап“ од Сеул.

„Меѓународната заедница има големи очекувања од улогата на Јужна Кореја, а неговиот одговор (Јун) беше даден во тој контекст“, додаде неименуваниот функционер.

Јун треба да ги посети САД во текот на овој месец за билатерална средба со неговиот американски колега Џо Бајден.