ЕУ го зголемува производството на оружје за Украина

АТИНА (АА) – Европската Унија (ЕУ) го зголемува производството на оружје за Украина, изјави денес шефицата за надворешна политика на ЕУ, Каја Калас, јавува Анадолу.

„Ги знаеме одбранбените потреби на Украина, и ЕУ го засилува производството на оружје за да ги забрза испораките“, напиша Калас на социјалната мрежа „X“ по средбата со украинскиот министер за одбрана, Рустем Умеров.

Таа додаде дека „Европа стои со Украина и нејзиниот храбар отпор против бруталниот руски агресор“.

Таа ги даде овие изјави еден ден по специјалниот самит на Советот на ЕУ за европската одбрана и Украина.

На состанокот, сите земји членки, освен Унгарија, ја поддржаа изјавата во која се изразува поддршка за Украина.

„Руската војна на агресија врз Украина и нејзините последици врз европската и глобалната безбедност во променливото опкружување претставуваат егзистенцијален предизвик за ЕУ“, се вели во документот, со кој се ветува дека Блокот ќе ја интензивира и забрза својата поддршка за Украина, додека САД ја намалуваат воената и разузнавачката поддршка.

Целиот Блок исто така се согласи да ги зголеми трошоците за одбрана.

„Денес, Европа направи важни чекори за да инвестира повеќе во одбраната и да го забрза производството и испораката на оружје“, објави Калас синоќа. „Моментот е сега. Украина мора да го добие сето она што ѝ е потребно за да се одбрани.“