НАТО ја покани Русија на нови состаноци за да се избегне војна во Украина

БЕРЛИН (АА) - НАТО ја покани Русија на нови состаноци за да се разговара за безбедносната загриженост на Москва и да се спречи руската агресија врз Украина, соопшти денес челникот на Алијансата, Јенс Столтенберг, јавува Агенција Анадолија (АА).

На заедничката прес-конференција со германскиот канцелар Олаф Шолц во Берлин, генералниот секретар Столтенберг рече дека сојузниците на НАТО се подготвени да се сретнат со Русија за да разговараат за конкретни предлози и да бараат конструктивни резултати.

„Денес ја поканив Русија и сите сојузници на НАТО да присуствуваат на серијата состаноци во Советот НАТО - Русија во блиска иднина, да ги решат нашите грижи, но исто така да ја слушнат загриженоста на Русија и да се обидат да најдат начин да се спречи каков било воен напад врз Украина“, рече тој.

„Ризикот од конфликт е реален. Сојузниците на НАТО ја повикуваат Русија на деескалација. Каква било понатамошна агресија скапо ќе ја чини Москва“, истакна тој.

Забелешките на Столтенберг дојдоа во услови на растечка загриженост поради неодамнешното распоредување руски војници на украинската граница и стравувањата од нов воен напад врз земјата.

Русија претходно изнесе низа предлози во кои ја негира намерата за агресија врз Украина и бара безбедносни гаранции од Западот, меѓу кои и невлегување на Украина во НАТО и нераспоредување на оружјето на НАТО на украинска територија.