ИСТАНБУЛ (АА) – Во време кога продолжуваат нападите на Израел врз Палестинците, познати светски имиња од различни земји во светот продолжуваат со реакциите кон Израел, пренесува Агенција Анадолија (АА).
Познатите имиња, кои имаат милиони следбеници на социјалните медиуми, продолжуваат да го поддржуваат палестинскиот народ со пораки преку социјалните медиуми.
Според информациите собрани од новинарот на АА, Бела Хадид, американската манекенка со палестинско потекло, во првите денови на настаните на својот профил на социјалните мрежи напиша: „Ако сте Американец, треба да знаете дека даноците што ги плаќате имаат удел во овие настани! Ние секоја година плаќаме 3,8 милијарди долари на Израел. Дали го знаевте ова?“
Споделувајќи ги снимките од Маршот за поддршка на Палестина, кој се одржа во Њујорк и на кој учествуваше и самата, рече: „Така се чувствувам сега. Да се биде покрај убави, интелигентни, почитувани, љубезни и дарежливи Палестинци. Чувство на една целина. Слободна Палестина додека Палестина не стане слободна.“
Повеќе од 30.000 луѓе ја коментираа објавата на манекенката, која има повеќе од 42.000.000 следбеници.
- „Етничкото чистење на палестинскиот народ мора да заврши“ -
Џиџи Хадид, сестрата на Бела Хадид, како и другите членови на семејството, на своите профили на социјалните мрежи исто така споделија порака за поддршка на Палестинците.
Дуа Липа, британската пејачка со албанско потекло, на својот профил на Инстаграм на кој има повеќе од 66.000.000 следбеници, напиша: „Етничкото чистење на палестинскиот народ мора да заврши. Доста е! Ова е прашање за човековите права. Луѓе, разбудете се!“
Зајн Малик, британски пејач со пакистанско потекло, осврнувајќи се на нападите на Израел, даде поддршка до палестинскиот народ.
„Јас сум покрај палестинскиот народ. Срцето ме боли за семејствата кои ги изгубија своите најблиски. Не можеме да стоиме како тивки сведоци на децата кои останаа сирачиња и кои се убиени“, нагласи Зајн Малик.
- „Поддржувате отстранување на луѓе од нивните домови како геноцид“ -
Роџер Вотерс, главниот пејач на познатата британска рок-група „Пинк Флојд“, објави видео во кое го критикува присилното иселување на Палестинците кои живеат во квартот Шејх Џерах во окупираниот источен Кудс (Источен Ерусалим) од страна на еврејските доселеници.
Упатувајќи повик до американскиот претседател Џо Бајден, кој рече: „Го поддржувам Израел под сите околности“, Вотерс во видеото нагласи:
„Вие поддржувате истерување на луѓе од нивните домови како геноцид. Како би се чувствувал ти, Џо Бајден? Седиш во твојата куќа, тоа е местото каде што живееш со твоето семејство со векови и некои ѓубриња доаѓаат и го одземаат тоа.“
И канадскиот R&B уметник Викнд (The Weeknd) сподели илустрација на Инстаграм со пораката „Заштитете го Кудс“ за поддршка на раселените Палестинци.
Познатиот пијанист и композитор Фазил Сај исто така се наоѓа меѓу уметниците кои споделија поддршка за Палестина на својот профил на социјалните мрежи.
Споделувајќи фотографија од моменти кога Израел ја бомбардира Газа, Фазил Сај рече:
„Во рацете на еден старец во Газа пишуваше: Земи ја мојата вода, уништи ја мојата куќа, земи ми ја работата, укради ја мојата земја, стави го татко ми во затвор, убиј ја мајка ми, бомбардирај ја мојата земја, оставете нѐ сите гладни, понижете нѐ сите. Но, сепак јас сум виновен. Зошто? Затоа што одговорив со ракета.“
- „Време е за санкции против Израел за да ги ослободат Палестинците“ -
Американскиот актер и режисер Марк Руфало во својата објава со хаштагот „Шејх Џерах“, даде линк од веб-страница која повикува на собирање 2 милиони потписи за да се донесат санкции против Израел.
„Во Кудс 1.500 Палестинци се соочуваат со депортација, 200 демонстранти се повредени, 9 деца се убиени. Време е за санкции против Израел за ослободување на Палестинците“, напиша Марк Руфало.
- „Со жалење го осудувам прогонот на палестинскиот народ“ -
Познатата пејачка Ријана исто така сподели објава на својот инстаграм-профил. Пејачката од Барбадос во својата објава напиша:
„Срцето ми е скршено од насилствата меѓу Израел и Палестина! Не се осмелувам да го видам тоа! Невини израелски и палестински деца се кријат од бомби во засолништа, повеќе од 40 лица го загубија животот. Најмалку 13 невини деца починаа само во Газа!“
Познатата шведска поп-пејачка Зара Ларсон на својот инстаграм-профил ја сподели фотографијата „Слободна Палестина“, и ја истакна својата реакција до Израел.
„Ние мора да застанеме во одбрана на оние кои се подложени на антиеврејско насилство и закани низ целиот свет. Но ние исто така мора да сметаме дека државата финансирана со американски долари е одговорна за апартхејд и убиството на цивилите. Едното не треба да го исклучува другото. Тоа што се случува сега во Палестина е срам, злосторство“, напиша Зара Ларсон.
„Солидарност со палестинскиот народ кој е подложен на етничко чистење и е тероризиран од израелската Влада и еврејските доселенички организации... Светот гледа на тоа“, напиша познатата актерка Сузан Сарандон на својот профил на Твитер.
Актерката Лена Хеди, која го глумеше ликот на Серсеи Ланистер во ТВ-серијата „Играта на троновите“ (Game of Thrones), не можеше да остане рамнодушна на она што се случува и со многу објави на својот профил на Инстаграм изреагира против израелските напади.
Познатиот турски пејач Таркан против израелскиот прогон на Палестина го употреби изразот „срам за човештвото“.
Во својата објава на својот профил на Инстаграм, познатиот пејач рече: „Овие слики што ги гледам со голема тага се непријатни и срам за човештвото. Го осудувам прогонот врз палестинскиот народ.“
Познатиот турски актер Џунејт Аркин, во својата објава со хаштагот „#AksadaBaskınVar“ (Има рација во Акса), рече: „Децата за Бајрам, наместо да носат бајрамска облека, се погребуваат. Ќе бидете проколнати цел живот.“
Американската актерка, добитничка на Оскар, Виола Дејвис, од својот профил на Инстаграм напиша: „Ајде да разговараме за тоа што се случува со Шејх Џерах“ и за своите следбеници сподели слики за нападите на Израел против Палестинците од 1948 година.
Натали Портман, американската актерка со израелско потекло, на Инстаграм сподели објава во која се објаснува тоа што се случило во Шејх Џерах.
„Ова е маѓепсан круг што трае долго време. Израел заслужува да живее како слободна и безбедна нација. И нашите соседи го заслужуваат истото. Се молам за оние што ги загубија своите животи и нивните семејства. Се молам да заврши ова непријателство. Се молам нашите лидери да најдат решенија за да може во мир да живееме едни покрај други“, напиша израелската актерка Гал Гадот која ја игра главната улога во „Чудесна жена“ (Wonder Woman).
Исто така, и турските пејачи и актери како што се Фунда Арар, Гулбен Ерген, Фетах Џан, Мурат Кекили, Мехмет Али Ербил, Алишан, Сердар Ортач, Хадисе, Берѓузар Корел и Каан Јилдирим упатија пораки со поддршка на Палестинците.
