ЖЕНЕВА (АА) - Американскиот државен секретар и рускиот министер за надворешни работи пристигнаа во Женева поради закажаните разговори денеска, во обид да ги намалат тензиите и да спречат конфликт околу Украина, јавува Агенција Анадолија (АА).
Државниот секретар Ентони Блинкен и министерот за надворешни работи, Сергеј Лавров, се сретнаа во историскиот хотел „Претседателот Вилсон“ на брегот на Женевското Езеро, каде што во изминатите децении се водеа многу тензични преговори за мир во светот, при што двајцата закажаа прес-конференции неколку часа по состанокот.
„Сите ние сме подеднакво посветени на патот на дипломатијата и дијалогот во обид да ги решиме нашите разлики“, рече Блинкен на почетокот на средбата.
„Но, ние сме исто така посветени, ако тоа се покаже невозможно и ако Русија одлучи да продолжи со агресија против Украина, за обединет, брз и остар одговор“.
Лавров рече: „За време на едно од вашите последни меѓународни патувања рековте дека не очекувате напредок од оваа средба.
„Ние не очекуваме никаков напредок ниту од оваа средба: очекуваме одговори на нашите предлози.
Рускиот претседател Владимир Путин постави различни барања од Западот, меѓу кои и барањето Украина да се спречи да се приклучи на НАТО.
И двајцата претставници закажаа прес-конференции за неколку часа по средбата.
Блинкен вчера ја предупреди Москва дека каква било воена агресија врз Украина ќе донесе сериозни последици за Русија.
Тој рече дека Соединетите Американски Држави (САД) и нивните сојузници сакаат дипломатско решение, но исто така се подготвени да одговорат на каква било воена агресија.
- Мали очекувања од состанокот -
Дипломатите имаат ниски очекувања за каков било значаен напредок денеска, и покрај сериите разговори за безбедноста кои веќе се одржаа оваа година.
„Доколку одредени руски воени сили се придвижат кон украинската граница и извршат нови акти на агресија против Украина, тоа ќе биде проследено со брз, тежок, обединет одговор од САД и нивните сојузници и партнери“, рече претходно Блинкен на прес-конференција во Берлин.
Русија истакна дека нема намера да го нападне нејзиниот сосед Украина, која порано беше дел од Советскиот Сојуз.
Блинкен, исто така, се состана со министрите за надворешни работи на Германија, Франција и Велика Британија во Берлин за да разговараат за последните случувања и да воспостават обединет пристап кон Москва во услови на зголемени стравувања дека рускиот напад врз Украина наскоро ќе се случи.
По состанокот, Блинкен рече дека САД и нивните сојузници ги делат истите цели и продолжуваат да ги следат дипломатските напори за да спречат понатамошна руска инвазија или дестабилизација на Украина.
Разговорите денеска во Женева уследија по дискусиите од 10 јануари помеѓу заменик-државната секретарка на САД, Венди Шерман и рускиот заменик-министер за надворешни работи, Сергеј Рјабков.
По состанокот, Шерман рече дека таа многу отворено зборувала за каква било можна инвазија на Русија врз соседот Украина.
„Јасно ставивме до знаење дека ако Русија понатаму ја нападне Украина, ќе има значителни последици и трошоци многу повеќе од она што го направи во 2014 година“, рече Шерман по тие разговори, мислејќи на преземањето на Крим.
Во услови на зголемени тензии помеѓу Русија и Западот, очите уште еднаш се свртени кон руско-украинската граница и териториите на фронтот.
Додека дипломатските напори за да се деескалира тензијата, продолжуваат, светот внимателно ги следи воените активности долж границата.
Русија е обвинета дека собрала повеќе од 100.000 војници во близина на границата со Украина, потег кој предизвика загриженост кај Западот дека Москва можеби планира нова воена офанзива против својот поранешен советски сосед. Кремљ ги негира обвинувањата на Западот за претстојна инвазија, велејќи дека силите на Русија се таму за вежби.
Во февруари 2014 година, руските сили влегоа на полуостровот Крим, а претседателот Владимир Путин следниот месец формално го подели регионот во два посебни федерални субјекти на Руската Федерација.
Турција и САД, како и Генералното собрание на ОН, сметаат дека анексијата е нелегална.
Според ОН, во борбата помеѓу силите на украинската Влада и проруските сепаратисти во украинскиот регион Донбас, животот го загубија 13.000 луѓе од 2014 година.
