Русија чека одговор на предлогот за безбедносни гаранции

МОСКВА (АА) - Русија не доби никаков суштински одговор на нејзиниот предлог за безбедносни гаранции, рече денес портпаролот на Кремљ, Дмитриј Песков, јавува Агенција Анадолија (АА).

Ги слушнавме зборовите повикувајќи се на различни извори во врска со подготвеноста да се дискутира [за прашањето], и ова е веројатно позитивен фактор. Но, сè уште нема суштински одговор, па затоа е прерано да се даваат проценки“, изјави Песков за новинарите во Москва.

Песков призна дека разговорите за безбедносните гаранции може да пропаднат, додавајќи дека Русија разгледува широк спектар на опции во случај на распоредување на воената инфраструктура на НАТО во близина на нејзините граници.

„Не е тајна дека распоредувањето на различни видови оружје [на НАТО] во близина на нашите граници, кое може да претставува опасност за нас, ќе бара преземање соодветни чекори за да се балансира ситуацијата. Овде се можни различни опции“, нагласи тој.

Во одделна изјава, рускиот заменик-министер за надворешни работи, Сергеј Рјабков, ги повтори зборовите на портпаролот на Кремљ, велејќи дека Москва сè уште чека реакција од Вашингтон.

Рјабков додаде дека Русија го земала предвид ставот на ЕУ во однос на осигурувањето безбедносни гаранции за Русија, но сепак инсистира на билатерален процес на разговори со САД.

„Ние поточно на САД им нудиме спроведување на билатерални преговори на оваа тема. Што се однесува до другите формати, желбите на одредени личности, претставници на одредени структури, се разбира, ги земаме предвид, но тоа не значи дека го менуваме нашиот став“, рече тој.

„САД најверојатно ќе се обидат да ги одложат разговорите, да ги претворат во бавен процес, да направат дополнителни услови и барања“, додаде Рјабков.

„Но, тоа итно ни е потребно бидејќи ситуацијата е многу тешка, акутна, има тенденција дополнително да се искомплицира, така што не можеме да одложуваме, подготвени сме веднаш да ги започнеме овие преговори“, рече тој.

Рјабков порача дека доколку разговорите за безбедносните гаранции успеат, односите меѓу Русија и САД можно е да се подобрат.

„Засега нема напредок во билатералните спорови, вклучително и визните прашања и работата на дипломатските претставништва“, истакна тој.

Рускиот претседател Владимир Путин го повика НАТО да започнат разговори со цел да ѝ се обезбеди на Русија сигурни, правно обврзувачки и долгорочни безбедносни гаранции.