Унгарија е строго против новиот пакт на ЕУ за миграциите

АТИНА (АА) - Унгарија го повтори своето остро противење на новиот договор на Европската Унија (ЕУ) за мигрантите, усвоен од Советот за правосудство и внатрешни работи во јуни, соопшти Кабинетот на премиерот, јавува Анадолу.

Договорот не се занимава со проблемот на азил и нема да ја запре илегалната миграција, истакна државниот секретар во Министерството за внатрешни работи на Унгарија, Бенце Ретвари.

„Унгарија го отфрла промигрантскиот предлог на Брисел“, рече Ретвари, тврдејќи дека пактот, кој го нарече потенцијален магнет за мигрантите, ќе ја отвори вратата за нова масовна илегална миграција во Европа.

Ретвари истакна дека договорот, за кој моментално се расправа, долгорочно ќе ја дефинира иднината на Европа, безбедноста, економската конкурентност и составот на нејзиното население доколку биде усвоен.

Земјите членки на ЕУ ќе мора да прифатат почетна квота од 30.000 мигранти од земјите кои се изложени под притисок на нерегуларната миграција од Блискиот Исток и Африка, вклучувајќи ги Грција и Италија, или да платат околу 22.000 евра за секој неприфатен мигрант, се наведува во договорот.

Полска и Унгарија беа против новите правила, но тие беа надгласани.