ИСТАНБУЛ (АА) – Велосипедистот од Нов Зеланд, Патрик Бевин, е победник на 57. Претседателска велосипедска трка низ Турција (Tour of Turkiye), откако истанбулската етапа од трката беше откажана поради небезбедните временски услови, јавува Агенција Анадолија (АА).
Бевин, кој вози за Израел-Премиер Тек, победи врз база на завршената седма етапа од трката што се одржа вчера на патеката Гелиболу - Текирдаг долга 135,3 километри низ западна Турција, завршувајќи ја за три часа, 21 минута и две секунди.
Со својата победа, 31-годишниот велосипедист се искачи на врвот на генералниот пласман на трката.
Џеј Вајн од тимот Алпецин-Феникс заостана две секунди зад Бевин, а Николас Едет од тимот Аркеа Самшик беше трет, само четири секунди зад првопласираниот.
Седмата етапа, што ја возеа 153 велосипедисти од 25 тимови, се одржа вчера, започнувајќи од историскиот полуостров Галиполе (Гелиболу), а завршувајќи во северозападната област Текирдаг.
Трката од осум етапи требаше да заврши во Истанбул денес, со вкупна должина од 1.303 километри, но последната етапа денес беше откажана поради лошото време.
Иако трката започна рано утрово на познатиот плоштад Таксим во Истанбул со учество на 149 велосипедисти од 25 тимови, координаторите на тимовите побараа откажување поради небезбедниот лизгав пат кога тимовите пристигнаа во подрачјето на Кузгунџук на азиската страна, по возењето 141,1 километри.
Претседателската велосипедска трка на Турција, организирана под покровителство на Кабинетот на турскиот претседател Реџеп Таип Ердоган, започна на 10 април. Трката ја организираше Велосипедската федерација на Турција.
Позната како „Мармара тур“, оваа трка првпат се возеше во 1963 година, а веќе од наредната година се возеше под називот „Претседателска велосипедска трка на Турција“.
