240 деца убиени во Иран од почетокот на војната, 13 од нив се под петгодишна возраст

ИСТАНБУЛ (АА) – Иранското Министерство за здравство денес соопшти дека повеќе од 18.000 луѓе се ранети во нападите на „непријателите агресори“, а меѓу нив има и деца, покажуваат официјалните податоци објавени за периодот до 15 март, јавува Анадолу.

Министерството информираше дека 18.254 од ранетите се веќе лекувани и отпуштени од болница, додека 1.070 лица остануваат хоспитализирани.

Исто така, соопштено е дека врз повредените се извршени 735 хируршки интервенции.

Во соопштението на Министерството се наведуваат 204 смртни случаи на лица помлади од 18 години, вклучувајќи и 13 деца на возраст под 5 години. Се додава дека 1.275 од повредените се малолетни лица, меѓу кои и 45 деца помлади од 2 години.

Податоците исто така покажуваат дека 226 од загинатите и 3.002 од ранетите се жени, соопшти Министерството.

Тензиите во регионот нагло ескалираа откако Израел и САД на 28 февруари започнаа заеднички напади врз Иран, во кои досега се убиени околу 1.300 луѓе, вклучувајќи го и тогашниот врховен лидер Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што се наоѓаат американски воени бази, предизвикувајќи човечки жртви и штети на инфраструктурата, истовремено нарушувајќи ги глобалните пазари и авиосообраќајот.