Захарова: „Зад новата мисија на ЕУ во Ерменија стојат исклучиво геополитички мотиви“

МОСКВА (АА) - Зад новата мисија на Европската Унија во Ерменија, на границата со Азербејџан, стојат геополитички мотиви, а не решавање на конфликти, соопшти руското Министерство за надворешни работи, јавува Анадолу.

„Во овие обиди гледаме исклучиво геополитички мотиви, што е далеку од интересите за вистинска нормализација на односите на Кавказ“, изјави портпаролката на МНР на Русија, Марија Захарова.

„Се прави сè за да се отстрани Русија од регионот и да се ослаби нејзината историска улога како главен гарант за безбедноста“, нагласи таа.

Нарекувајќи го нагласувањето од страна на ЕУ за цивилниот карактер на новата мисија „неискрено“, таа рече: „Таа се распоредува во смисла на Заедничката безбедносна и одбранбена политика (ЕУ). Затоа, мора да го согледаме ова соодветно“.

Таа додаде дека ЕУ и Западот ја користат секоја можност да се вкоренат во регионот воопшто и во Ерменија особено.

Захарова рече дека Азербејџан дал голем број негативни оценки за распоредувањето на мисијата, што биле игнорирани.

Укажувајќи на „двосмисленото“ искуство на ЕУ во решавањето на конфликтот, таа истакна дека недостасуваат примери за успешни резултати во овој поглед.

„Комплексот на договорите меѓу лидерите на Русија, Азербејџан и Ерменија, останува клучниот фактор на стабилноста и безбедноста во регионот“, нагласи таа.

„Имплементацијата на договорите е најдиректниот начин за подобрување на ситуацијата во регионот“, рече таа, вклучувајќи чекори како деблокирање на транспортните комуникации, разграничување на ерменско-азербејџанската граница, воспоставување контакти меѓу јавноста, експертите, верските кругови и парламентарците на двете земји, како и преговори за изработка на мировен договор.“

„Руската Федерација е подготвена да продолжи да придонесува за ова на секој можен начин“, рече Захарова.

ЕУ вчера го објави започнувањето на двегодишна цивилна мисија во Ерменија за да придонесе за „стабилноста во пограничните области на Ерменија, да изгради доверба и човечка безбедност во областите погодени од конфликтот и да обезбеди средина погодна за напорите за нормализација меѓу Ерменија и Азербејџан поддржана од ЕУ“, се вели во соопштението на Блокот.

Се вели дека во цивилниот персонал на мисијата ќе има приближно 100 луѓе, вклучително и околу 50 невооружени набљудувачи.

Односите меѓу поранешните советски републики Ерменија и Азербејџан се тензични од 1991 година, кога ерменската војска го окупираше Нагорно Карабах, територија меѓународно признаена како дел од Азербејџан, и седум соседни региони.

Во есента 2020 година, за време на тешките борби што траеја 44 дена, Азербејџан ослободи значаен дел од Карабах, а потоа беше потпишан мировен договор со посредство на Русија.

Сепак, мировниот договор не стави крај на конфликтот покрај границата и на другите спорови меѓу двете земји.