Necva Taştan Sevinç
06 Март 2025•Ажурирај: 06 Март 2025
ИСТАНБУЛ (АА) - Францускиот претседател Емануел Макрон денес предупреди дека потенцијалните американски царини за европските производи нема да останат без одговор, укажувајќи на можните економски последици и повика на координирана европска реакција, известува Анадолу.
Неговите изјави следуваа по неодамнешниот потег на Вашингтон да воведе царини за Канада и Мексико, одлука што Макрон ја нарече неразбирлива и економски штетна.
Во телевизиското обраќање тој предупреди дека слични мерки против Европа би се соочиле со силно отфрлање.
„Европа мора да се подготви за можноста САД да воведат царини за европските стоки“, рече Макрон и додаде:
„Додека подготвуваме одговор со нашите европски колеги, ќе продолжиме, како и пред 15 дена, да правиме сѐ што е можно за да го убедиме американскиот претседател дека оваа одлука би ни наштетила на сите.“
Францускиот претседател, исто така, изрази загриженост за промената во политиката на САД, истакнувајќи дека намалената поддршка на Вашингтон за Украина и планираните царини за европските стоки сигнализираат предизвик за периодот што е пред нас.
Mакрон инсистира на тоа дека Европа мора да преземе поголема одговорност за сопствената безбедност.
„Иднината на Европа не смее да се решава во Вашингтон или Москва“, рече претседателот на Франција.
