Путин и Лукашенко во Москва разговараа за тензиите околу Украина

МОСКВА

Рускиот претседател Владимир Путин денеска во Москва се сретна со својот белоруски колега Александар Лукашенко, додека тензиите со Западот се зголемуваат околу Украина, јавува Агенција Анадолија (АА).

Отворајќи го состанокот, Путин рече дека билатералната трговија се зголемува и се постигнува напредок во однос на сојузната држава, концепт чија цел е поголема интеграција на двете земји.

Путин рече дека ќе разговара со Лукашенко за регионалната ситуација и воената соработка, а двајцата лидери ќе ги надгледуваат планираните воени вежби во сабота.

Лукашенко рече дека Западот го испаничил светот велејќи дека Русија и Белорусија ќе ја нападнат Украина, но ниту Москва ниту Минск „никогаш не размислувале за тоа“.

Западните земји ја обвинија Русија дека собрала повеќе од 100.000 војници во близина на Украина, предизвикувајќи стравувања дека таа би можела да планира воена офанзива против својот поранешен советски сосед.

Негирајќи дека се подготвува за инвазија, Москва ги обвини западните земји дека ја поткопуваат нејзината безбедност преку проширувањето на НАТО кон исток.

Кремљ вели дека повлекол дел од своите војници по воените вежби, но западните лидери тврдат дека допрва треба да видат докази за тоа.

Русија, исто така, побара враќање на распоредените војници од некои поранешни советски држави и гаранција дека НАТО нема да прифати некои од тие држави во Воената алијанса.

НАТО, сепак, рече дека „неговата врата останува отворена“ и секоја одлука за членство треба да ја преземат сојузниците и земјите аспиранти, а никој друг.

Белорусија се приближи до Русија по спорните претседателски избори во август 2020 година, на кои Лукашенко го освои шестиот мандат.