Саудијки назначени на високи позиции во светите џамии

АНКАРА

Саудиска Арабија назначи две жени на високи позиции во администрацијата што ги надгледува двете свети џамии за муслиманите, пренесуваат локалните медиуми денес, јавува Агенција Анадолија (АА).

Ал-Ануд ал-Абауд и Фатима ал-Рашуд беа назначени за помошници на претседателот на Генералното претседателство за работите на двете свети џамии, шеикот Абдулрахман ал-Судаис, објави порталот „Арапски вести“.

Двете жени имаат докторски титули.

Други жени беа назначени на високи нивоа за да ги надгледуваат различните одделенија на Претседателството, вклучувајќи ја и Камелија ал-Даади како помошник-потсекретар за административни и услужни работи на жените.

Во последниве години, Саудиска Арабија усвои политики за да ги зајакне жените и да им овозможи да достигнат високи позиции во јавните институции на Кралството.

Женската работна сила во земјата богата со нафта нагло порасна последните години, достигнувајќи околу 33 отсто во 2020 година, во споредба со 20 отсто во 2018 година, според институцијата „Брукингс“.