Четворица загинати и 27 повредени во руските напади во Украина

ИСТАНБУЛ (АА) - Четири лица загинаа, а 27 други се повредени во руските напади во украинските региони Доњецк, Херсон и Харков во изминатите 24 часа, пренесува Анадолу.

„За само еден ден, Русите убија еден жител на регионот Доњецк, а ранија уште 13“, изјави утринава гувернерот на Доњецк, Павло Кириленко, во порака на Телеграм.

Кириленко рече дека ракета погодила болница во Дружкивка, при што е причинета мала штета.

Кириленко понатаму рече дека градот Авдиевка бил гранатиран од артилерија, истакнувајќи дека и покрај тоа што нема жртви, има уништување на инфраструктурата.

Гувернерот на Херсон, Олександр Прокудин, на Телеграм утринава изјави дека едно лице загинало, а 10 се повредени во изминатиот ден како последица на руските напади.

„Во текот на изминатиот ден, непријателот изврши 79 напади, испукувајќи 350 гранати од тешка артилерија и беспилотни летала. Непријателот го гранатираше градот Херсон 12 пати“, рече Прокудин.

Прокудин, исто така, изјави дека во градот биле погодени и пазар и зграда на образовна институција, додавајќи дека 52 лица биле евакуирани од деокупираната територија на регионот.

Гувернерот на Харков, Олех Синјехубов, на својот профил на Телеграм напиша дека две тела биле пронајдени за време на операциите за пребарување и спасување на местото на рускиот воздушен напад во градот Вовчанск.

Синјехубов во претходната порака рече дека воздушните напади во Вовчанск погодиле две станбени згради, згради на фарми и пазар, предизвикувајќи пожар од големи размери.

„Првичните информации забележаа дека две лица се повредени поради ударите“, рече понатаму Синјехубов, додавајќи дека уште двајца биле повредени во селата Петропавливка и Дворична.

Во војната меѓу Русија и Украина, што сега е во втората година, досега се убиени 8.534 цивили, а ранети се 14.370 други, покажуваат најновите податоци на ОН.