Турција: Изборната комисија ќе ги објави конечните резултати на 5 јули

АНКАРА (АА) - Конечните резултати од вчерашните избори во Турција ќе бидат објавени на 5 јули, изјави денес претседателот на Врховната изборна комисија на Турција, Сади Ѓувен, јавува Anadolu Agency (AA).

„Ние со политичките партии досега споделивме 98 отсто од изборните резултати. За неколку часа ќе споделиме 100 отсто (од изборните резултати)“, им изјави на новинарите во Анкара претседателот на Врховната изборна комисија.

Ѓувен изјави дека во системот се внесени близу 100 отсто од записниците, додавајќи дека во системот не се внесени само записниците од 41 граничен премин.

Тој додаде дека 99,91 отсто од резултатите од претседателските избори се евидентирани во системот на комисијата.

Пофалувајќи го одвивањето на претседателските и парламентарните избори, Ѓувен истакна дека по финализирањето на изборните резултати тие ќе бидат на увид и на граѓаните.

Претходно, Ѓувен соопшти дека со 99,2 отсто отворени гласачки кутии, претседателот Реџеп Таип Ердоган освоил апсолутно мнозинство на претседателските избори со 52,5 отсто од гласовите, додека неговиот ривал Мухарем Инџе освоил 30,6 отсто од гласовите.

На парламентарните избори, Партијата на национално движење (MHP) и Партијата на правдата и развојот (АК партија), здружени во „Народната алијанса“ освоија 53,6 отсто од гласовите, од 99,1 отсто отворени гласачки кутии.

Претходно Ѓувен истакна дека преостанатите гласови нема да влијаат врз исходот на изборните резултати.