АНКАРА
Турција денес испрати 16 тони хуманитарна помош на Хаити откако таа карипска држава неодамна ја погоди земјотрес со јачина од 7,2 степени по Рихтер, јавува Агенција Анадолија (АА).
„Помошта, што вклучува 222 кутии храна и 270 кутии хигиенски производи, е подготвена по налог на турскиот претседател Реџеп Таип Ердоган“, се наведува во соопштението на турската Агенција за управување со катастрофи и итни случаи (АФАД).
„Помошта ќе биде испорачана во Хаити со товарен авион на Турските воздушни сили, а ќе ја дистрибуира тимот на АФАД“, се додава во соопштението.
Најмалку 2.207 лица загинаа, а повеќе од 12.268 се повредени во земјотресот со јачина од 7,2 степени по Рихтер што минатиот викенд го погоди Хаити.
Агенцијата за цивилна заштита на Хаити соопшти вчера дека најмалку 344 лица и понатаму се водат како исчезнати.
Наведено е дека се уништени околу 53.000 објекти.
