Путин: „Западот се обидува да го запре формирањето на мултиполарен свет“

МОСКВА (АА) - Рускиот претседател Владимир Путин изјави дека Западот со започнувањето стари судири се обидува да го запре формирањето на мултиполарен свет за да ја зачува својата хегемонија, јавува Агенција Анадолија (АА).

Говорејќи на Московската конференција за меѓународна безбедност 2022 година, Путин рече дека западните земји настојуваат да ги држат земјите и народите во синџирите на неоколонијален поредок.

„Нивната (западна) хегемонија значи стагнација за цел свет, за целата цивилизација, значи опскурантизам, укинување на културата и неолиберален тоталитаризам“, рече тој.

Додаде дека во обид да ја зачуваат својата доминација, „САД и сојузниците грубо се мешаат во внатрешните работи на земјата, организираат државни удари, граѓански војни, провокации, користат закани и притисок да ги потиснат државите кон нивната волја“.

„Под овие услови, одлучивме да спроведеме специјална воена операција во Украина, во целосна согласност со Повелбата на ОН. Целите на оваа операција се јасно дефинирани - обезбедување на безбедноста на Русија и нашите граѓани, заштита на жителите на Донбас од геноцид“, рече Путин.

Додаде дека ситуацијата во Украина покажува дека САД работат на одолговлекување на судирот.

Путин тврди дека воспоставувањето на воените сојузи во азиско-пацифичкиот регион е еден дел од американскиот план.

„Очигледно е дека со помош на вакви дејства западните глобалистички елити се обидуваат да го оттргнат вниманието на сопствените граѓани од акутните социоекономски проблеми: пад на животниот стандард, невработеност, сиромаштија, деиндустријализација - за своите неуспеси да ги префрлат на другите земји, односно Русија и Кина“, истакна тој.

Според податоците на руското Министерство за одбрана, на Форумот во Москва ќе учествуваат повеќе од 700 воени претставници од повеќе од 37 земји.