Од 1. јуни САД со нови увозни давачки на челикот и алуминиумот

ВАШИНГТОН (АА) - Соединетите Американски Држави (САД) од 1 јуни ќе започнат со наплаќање на додатни царински тарифи на увезениот челик и алуминиум за Мексико, Канада и земјите на ЕУ, јавува Agency Agency (AA).

Американскиот министер за трговија, Вилбур Рос, за медиумите изјави дека на 1 јуни истекува периодот до кој привремено е одложено стапувањето на сила на одлуките за додатните царински тарифи за Мексико, Канада и ЕУ.

Тој додаде дека преговорите со ЕУ сè уште траат, но во преговорите со Мексико и Канада сè уште нема резултати. Мексико, САД и Канада од август минатата година се во преговори за модернизација на Договорот за слободна трговија во Северна Америка (NAFTA).

На иницијатива на Доналд Трамп, САД на 23 март воведоа нови царини на челик во висина од 25 отсто и на алуминиум од 10 отсто. Тоа важеше за сите земји кои ги извезуваат овие призводи во САД, но за Австралија, Аргентина, Бразил, Канада, Мексико, Јужна Кореја и земјите од ЕУ беа одложени до 1 јуни.